Vötnin í Svínadal á leið í útboð

Vötnin í Svínadal hafa lengi verið ágætlega stunduð af veiðimönnum en þó hefur aðsóknin minnkað nokkuð síðustu tvö sumur en á því kann að verða breyting.

Veiðifélag Laxár í Leirársveit sendi nýlega frá sér tilkynningu um að leitað verði tilboða í vötnin þrjú í Hvalfjarðarsveit, Geitabergsvatn, Þórisstaðavatn og Eyrarvatn.  Ásamt vötnunum fylgir Selós og Þverá sem rennur á milli vatnana en í henni er oft lax sem gengur í vötnin úr Laxá í Leirársveit.  Veiðitímabilið sem er boðið út er 2015-2017.  Í vötnunum er annars bæði urriði og bleikja og oft í miklu magni en heldur smá.  Inná milli má svo oft setja í stóra urriða og þá sérstaklega í Eyrarvatni en að veiða í vatninu á sumarkvöldum þegar stóru urriðarnir koma inná grynningarnar í ætisleit.

Forvitnilegt verður að sjá hverjir bjóða og hversu mikið verður boðið í veiðiréttinn en frestur til að skila inn tilboðum rennur út 20. nóvember.  Lítið hefur annars frést af öðrum útboðum en líklegt er að einhverjar hreyfingar verði í ánum áður en veturinn er úti.