Rjúpnaveiðin byrjar á morgun

Skyttur landsins undirbúa sig undir rjúpnaveiðitímabilið sem byrjar á morgun en það kemur líklega til með að viðra ágætlega þessa fyrstu helgi veiðanna.

Veitt er næstu fjórar helgar frá föstudegi til sunnudags eða samtals í tólf daga.  Það kveikti óneitanlega í veiðimönnum þegar rjúpnatalningar sumarsins komu í hús en stofninn virðist vera á uppleið en er þó enná undir meðaltali síðustu 10 ára.  Veiðimenn eru hvattir til að veiða hóflega og láta vita af förum sínum áður en lagt er af stað.  Það má reikna með mikilli umferð veiðimanna á helstu veiðislóðum fyrstu dagana en nokkuð er þó um að skyttur landsins sleppi fyrstu helginni til þess að losna við að veiða í því margmenni sem stundum verður á veiðislóð og þá sérstaklega á suðvestur- og vesturlandi.