Mögnuð bílaprófunarbraut Volvo

Volvo hefur byggt einstaka prófunarbraut fyrir bíla sína í Svíþjóð. Í henni á að vera hægt að prófa allar þær aðstæður sem bílar geta lent í í umferðinni. Brautin er staðsett rétt fyrir utan Gautaborg.

Yfirlýst markmið Volvo er að enginn látist í bíl frá fyrirtækinu frá og með árinu 2020 og er þessi braut liður í þeim áætlunum, sem mörgum finnst ansi brött.

Brautin er ógnarstór, eða jafn stór og Mónakó. Hún inniheldur 5,6 kílómetra akstursbraut og alls eru malbikaðir 250.000 fermetrar og þar sem hraðakstur fer fram er brautin 240 metrar á breidd. Þetta eru allt hálfklikkaðar tölur, en til marks um það hversu mikil alvara er að baki hjá Volvo.

Í brautinn má finna hringtorg, gatnamót, hús, hjólreiðastíga, strætóbiðstöðvar, umferðarljós og þröngar götur sem breiðar, allt til að líkja eftir daglegum akstri fólks í þéttbýli og dreifbýli.  Hluti brautarinnar er upplýst og vegrið er einnig á hluta hennar.