Jaguar kaupir safn 543 breskra fornbíla

Finnur Thorlacius skrifar 6. ágúst 2014 15:15

Hið ótrúlega stóra safn tannlæknisins James Hull er nú komið í eigu Jaguar.

Breski bílaframleiðandinn Jaguar Land Rover gerði sér lítið fyrir nýlega og keypti eitt stærsta bílasafn eldri bíla af forföllnum bílasafnara. Þetta safn inniheldur aðeins breska bíla frá fyrri árum, þar á meðal 130 Jaguar bíla, en einnig Austin bíl sem Winston Churchill átti forðum og Bentley sem var í eigu Elton John.

Það er sérstök deild innan Jaguar Land Rover, svokölluð Special Operations, sem keypti safnið og sér um að varðveita það og nýta það til að halda uppá arfleifð þessa rótgróna breska sportbílaframleiðanda.

Safnið átti vel stæður tannlæknir

Safnið verður staðsett í Browns Lane í Coventry borg. Seljandi safnsins er afar vel stæður tannlæknir, James Hull að nafni sem rekur einar 50 tannlæknastofur um allt Bretland. Hann var að eigin sögn einkar kátur með að finna svo ábyrgan kaupanda af safni sínu og með því sé lífsstarf hans vel varðveitt í fyrirsjáanlegri framtíð.

Jaguar ætlar ekki að búta safnið niður heldur hafa það allt á einum stað. Það verð sem James Hull setti upp fyrir safn sitt var 19,5 milljarðar króna, en sögur herma að Jaguar hafi ekki rétt fram alla þá upphæð, enda vakti það helst fyrir eigandanum að koma því í sem ábyrgastar hendur.