Fyrsti laxinn kominn úr Jöklu

Jökla er eitt af þessum veiðisvæðum sem má kalla nýtt þó þar hafi verið nostrað við ánna í nokkur ár til að gera hana að góðri laxveiðiá á alla mælikvarða.

Veiðiþjónustan Strengir hefur unnið í því ásamt landeigendum að rækta upp stofninn í Jöklu og sleppa laxi í hliðarárnar Kaldá, Fögruhlíðará og Laxá, en árangurinn af því starfi er farinn að skila sér í auknum göngum af laxi á þessu svæði.  Jökla opnaði 1. júlí en hefur verið erfið til veiða vegna vatnsmagns.  Fyrsti lax sumarsins kom upp í gær hjá Breskum veiðimanni sem var með Sævar Hafsteinsson leiðsögumann með sér.  Þetta var 77 sm lax sem tók í veiðistaðnum Skipalá og flugan var Svört Krafla.  Nokkuð af fiski var að sýna sig víða um ánna en fleiri komu þó ekki á land í gær.  Eins og áður segir er áin nokkuð vatnsmikil er fer að sögn leiðsögumanna við hana hratt niður.  Þrátt fyrir vatnsmagn er hún ekki lituð.