Volkswagen staðfestir framleiðslu 7 sæta CrossBlue í Bandaríkjunum

Volkswagen bílaframleiðandinn veit að hann á mikla vinnu eftir til að heilla Bandaríkjamenn og ná markmiðum sínum um sölu bíla þar vestra. Volkswagen ætlaði að selja 800.000 bíla þar á ári en seldi aðeins 408.000 bíla þar í fyrra.

Eitt af því sem hækka á sölutölur Volkswagen vestanhafs er smíði nýs jeppa sem er með 7 sætum. Sá bíll var fyrst kynntur á bílasýningunni í Detroit í fyrra og hefur sá bíll vinnuheitið CrossBlue. Ekki var ljóst þá hvort sá bíll færi í framleiðslu en nú er það staðfest.

Volkswagen ætlar að smíða bílinn í verksmiðju sinni í Chattanooga í Tennessee við hlið Volkswagen Passat. Volkswagen þarf að fjárfesta fyrir 103 milljarða króna vegna framleiðslu hans. Þessi langi jeppi verður með þriðju sætaröðinni en slíkir bílar eru vinsælir í Bandaríkjunum og er þessi bíll sérstaklega ætlaður fyrir Bandaríkjamarkað þó svo framtíðin muni leiða í ljós hvort hann verður boðinn á öðrum mörkuðum einnig.

Bíllinn sem kynntur var í Detroit var með 190 hestafla og 2,0 lítra forþjöppudrifinni bensínvél, en hætt er við því að margar fleiri vélar verði í boði í bílnum. Hann verður að sjálfsögðu fjórhjóladrifinn. Ekki er ljóst á hvaða undirvagni hann verður byggður, en líklegt þykir að það verði sami MQB undirvagn og er undir Passat bílnum og yrðu því báðir bílarnir sem framleiddir eru í Chattanooga á sama undirvagni sem tryggir lægri kostnað við framleiðsluna.

Volkswagen þarf að bæta við 49.000 fermetrum við verksmiðjuna í Chattanooga til framleiðslunnar á CrossBlue. Búist er við að CrossBlue bíllinn komi á markað í Bandaríkjunum árið 2016.