Vatnsdalsá með 76 laxa og 83 sm meðallengd

Þrátt fyrir að sumar árnar hafi farið rólega af stað á suður og vesturlandi eru árnar fyrir norðan að standa sig með mikilli prýði og veiðin yfirleitt mjög góð.

Opnanir ánna fyrir norðan voru flestar með ágætum en veiðin eftir það hefur líka verið mjög fín og þar standa Blanda, Miðfjarðará og Vatnsdalsá upp úr.  Blanda er komin yfir 200 laxa og veiðin í Miðfjarðará er að komast á gott skrið en hún var í um 70 löxum þegar við heyrðum frá henni síðast.  Vatnsdalsá var komin í 76 laxa í gær sem er mjög góð byrjun í ánni því hún er aðeins búin að vera opin í 10 daga.  það sem vekur síðan eftirtekt er þessi glæsilega meðalþyngd en hún stendur í tæpum 6 kg og 83 sm á lengdina.  Það er hægt að skoða veiðitölurnar úr ánni á https://vatnsdalsa.is/en/fishing-report og þar er einnig hægt að sjá hvaða flugur laxinn tók.  Miðað við tölur dagsins úr ánum fyrir norðan og í samanburði við fyrri ár virðist stefna í að árnar þar verði vel yfir meðallagi í sumar ef veiðin heldur áfram með sama takti.