Þetta er framtíðin í veiðistaðalýsingum

Það kannast allir veiðimenn við að hafa mætt í á og veiðikortin eru léleg, merkingar slæmar eða engar og ekkert sem auðveldar mönnum að bera kennsl á veiðistaði.

Þetta getur verið afskaplega hvimleitt og er ekki bara bundið við litlar ódýrar ár því það er ekkert óþekkt að sumar af dýrustu ám landsins hafa ekki nægilega góðar merkingar og léleg veiðikort.  Það er þess vegna afskaplega gaman að sjá þegar veiðileyfasalar og leigutakar leggja metnað í að hafa þessi mál í lagi.  Veiðifélagið Strengur hefur gefið út veiðistaðalýsingar fyrir Selá í Vopnafirði inná síðu félagsins www.sela.is og það er óhætt að segja að þarna sé búið að setja ný viðmið í gæðum á veiðikortum.  Eins og sést á myndinni er ekki bara sýnt hvernig staðurinn er heldur sýnt hvar fiskurinn liggur, hvernig á að kasta á hann og frá hvaða stöðum er best að kasta.  Þetta er algjörlega til fyrirmyndar og verður vonandi til þess að önnur veiðifélög og leigutakar spíta í lófana og leggja meira í sín eigin veiðikort.