SVFR framlengir í Hítará

Stangaveiðifélag Reykjavíkur og Veiðifélag Hítarár skrifuðu undir nýjan samning um leigu á veiðirétti í Hítará á árbakkanum laugardaginn 14. júní.

Hítará verður því áfram hjá SVFR næstu árin. Hítará hefur verið einstaklega vinsæl meðal félagsmanna SVFR enda frábær laxveiðiá og veiðihúsið Lundur sem Jóhannes á Borg reisti einstakt og heillandi.  Ólafur Sigvaldason, formaður Veiðifélags Hítarár og Árni Friðleifsson, formaður SVFR, skrifuðu undir samninginn fyrir hönd félaganna.  Árni segir það einstaklega ánægjulegt að farsælt samstarf félaganna haldi áfram og að félagsmenn SVFR geti veitt í Hítará næstu árin. Áin sé fjölbreytt og skemmtileg og aðgengi að veiðistöðum gott.  Veiðimenn sem taka fyrstu köstin í Hítará þetta árið geta því farið að hlakka til en árnefnd SVFR við Hítará hefur unnið að því hörðum höndum undanfarið að gera veiðisvæðið klárt fyrir sumarið.  Í Hítará hafa veiðimenn getað eldað sjálfir í upphafi veiðitíma og á haustin en þar á milli er matreiðslumeistari á staðnum sem töfrar fram kræsingar fyrir veiðimenn á milli þess sem laxar eru dregnir á land. Þetta fyrirkomulag hefur notið mikilla vinsælda. Sumarið 2013 veiddust um 1150 laxar í Hítará og Grjótá og Tálma sem eru hliðarár Hítarár. Vonir veiðimanna standa til þess að veiðisumarið 2014 verði jafnframt gott.