Evrópski seðlabankinn lækkar stýrivexti

Evrópski seðlabankinn lækkaði í dag stýrivexti í 0,15% úr 0,25% í þeim tilgangi að örva hagvöxt og koma í veg fyrir verðhjöðnun á evrusvæðinu. 

Einnig voru innlánsvextir lækkaðir, úr 0% í -0,1%, sem þýðir að í stað þess að fá greidda vexti þurfa viðskiptabankar að borga fyrir að geyma fé hjá bankanum. Er þetta gert til að viðskiptabanka til að lána til fyrirækja, og þar með örva hagvöxt.

Evrópski seðlabankinn er sá fyrsti í hópi stóru seðlabankanna fjögurra til að grípa til þessa ráðs, en áður hefur slíkum aðgerðum verið beitt í Danmörku og Svíþjóð, með misjöfnum árangri.

Í kjölfar þessara aðgerða hafa hlutabréf hækkað víða á mörkuðum í Evrópu. Aftur á móti lækkaði gengi evru gagnvart bandaríkjadollar, og hefur ekki verið lægri í fjóra mánuði.