"Þú hafðir þrjár mínútur og þú klúðraðir því“

Söngvarinn Snorri Eldjárn flutti lagið Slá í gegn sem Stuðmenn gerðu frægt í undanúrslitum Ísland Got Talent í gærkvöldi.

Bubbi Morthens var ekki nógu sáttur með flutning Snorra að þessu sinni.

„Þegar ég heyrði í þér fyrst hugsaði ég bara: Vá, þetta er geggjuð rödd,“ sagði Bubbi en bætti svo við:

„Þú hefur þrjár mínútur til að slá í gegn og mér fannst þú allt í einu venjulegur. Bara meðalnáungi að syngja. Ég held að þú hafir valið kolvitlaust lag. Því ég batt svo miklar vonir við þig drengur. Þú hafðir þrjár mínútur og þú klúðraðir því að mínu mati - en þú ert æðislegur fyrir það,“ sagði Bubbi en Auðunn Blöndal, kynnir þáttanna, leiðrétti hann snarlega og benti á að keppendur fengju aðeins tvær mínútur á sviðinu.

Snorri komst ekki áfram í úrslit Ísland Got Talent en dómarar völdu á milli hans og Elvu Maríu og ákváðu að senda söngkonuna ungu í úrslitaþáttinn sem sýndur verður á Stöð 2 þann 27. apríl.