Vænar bleikjur í Varmá

Varmá hefur alltaf verið sterk á vorin í sjóbirtingnum en síðustu ár hafa margar vænar bleikjur komið á færi veiðimanna.

Steingrímur Sævarr Ólafsson var þar við veiðar og landaði fallegri 5 punda bleikju í Stöðvarhyl á brúna púpu númer #14.  Nokkrar slíkar hafa veiðst frá opnun en heldur rólegra virðist vera í sjóbirtingnum einhverra hluta vegna.  Frekar óliklegt er að hann sé þegar gengin niður en ef svo er þýðir það oft að hann komi þá bara fyrr í haust.  Flottar bleikjur draga þó veiðimenn að bökkum Varmár því það eru ekki margar silungsár svo stutt frá Reykjavík sem státa af 4-6 punda bleikjum.

Nokkur svæði sem hafa oft verið vinsæl á vorin eru ekki ennþá orðin veiðanleg sökum íss og nægir þar að nefna t.d. Hópið sem er alveg ísilagt.  Það er ekki einu sinni straumröst við vesturbakkann eins og oft er á vorin.  Hraunsfjörður er sömuleiðis lagður ís og í það minnsta 2-3 vikur í að hann verði þolanlega veiðanlegur.  Öll vötn sem eru í einhverri hæð, kannski að undanskildu Þingvallavatni eru lögð og verða varla veiðanleg fyrr en í maí.