Þriðjungur Formúlu 1 bíla knúinn vélum frá Renault

Það er oft áhugavert að skoða hver viðtekin sannindi eru álitin í tilteknum samfélögum. Á Íslandi er bílamarkaðurinn mjög frábrugðinn þeim sem er á meginlandi Evrópu. Bílar frá Asíu eru t.d. mjög vinsælir á Íslandi auk þess sem bandarískir pallbílar hafa átt upp á pallborðið. Á meginlandi Evrópu er þessu þveröfugt farið, en þar ráða evrópskir bílar lögum og lofum. VW, Peugeot (PSA samsteypan) og Renault eru þar fremstir og hefur Renault framleitt vélar fyrir Nissan, Dacia og Mercedes-Benz og síðast en ekki síst þriðjung Formúlu1 liðanna fyrir árið 2014.

Í ár hefur Alþjóðaakstursíþróttasambandið FIA breytt reglum um vélar eina ferðina enn. 2,4 lítra V8 vélarnar sem áður voru notaðar verða ekki leyfðar lengur hjá FIA þar sem nýju reglurnar kveða á um 1,6 lítra V6 vélar með tveimur túrbínum. Renault hefur hannað vél sem uppfyllir skilyrði FIA og er hún mikið undraverk. Hún getur snúist upp í 15 þúsund snúninga og nýtir endurnýtingarkerfi með tveimur rafmagnsmótorum sem í heild skilar 160 hestöflum til viðbótar við þau 600 sem bensínvélin framleiðir.

Aukið afl - miklu meiri sparnaður

Afl nýju V6 vélarinnar er meira en afl hinnar stærri V8 vélar sem áður var notuð. Það skiptir máli ásamt því að bílaframleiðendur þurfa að byggja kappakstursvélarnar á tækni sem er aðgengileg fyrir fólksbíla. Gríðarlegur kostnaður fer í rannsóknir og þróunarvinnu þar sem hver vél kostar 20 milljónir evra. Því er mikil áhersla lögð á að þróa eiginleika sem ýta undir sparneytni og endingu – jafnvel í Formúlu1 vélum – en sú tækni nýtist háþróuðustu vélunum sem eru fáanlegar fyrir Renault fólksbíla.

Formúlu 1 vél Renault fyrir næsta keppnistímabil þarf að uppfylla gríðarlega strangar kröfur. Hún má aðeins nota 100 lítra af eldsneyti við aðstæður þar sem 760 hestöfl vinna á hámarkssnúningi í hátt í tvo tíma og meðalhraðinn er fast að 250 km/klst. Kappaksturinn í sumar á eftir að verða spennandi enda þurfa 100 lítrar af eldsneyti að endast heila keppni og hver ökumaður mun aðeins fá fimm vélar á keppnistímabilinu. Það er því ljóst að það mun reyna meira á vélarnar en nokkru sinni fyrr. Eldsneytissparnaðurinn er 35% meiri en á síðasta keppnistímabili svo að verkefnið sé sett í eitthvert samhengi.