Lífleg stemning í garðinum

Café Flóra hefur verið starfrækt í Grasagarðinum í Laugardal allt frá árinu 1997. Í sumar býður kaffihúsið upp á nýbreytni í starfsemi sinni, en öll fimmtudagskvöld út ágúst geta gestir notið lifandi tónlistar í boði hússins.

„Í gegnum tíðina hafa okkur borist töluvert af fyrirspurnum frá íslenskum tónlistarmönnum um að fá að halda tónleika í garðskálanum og því var ákveðið að setja þetta tilraunaverkefni af stað,“ segir Þorkell Andrésson, framkvæmdastjóri Café Flóru.

„Við erum mjög ánægð með dagskrána sem við höfum sett saman, enda er úrval tónlistamanna frábært. Þetta er góð blanda af þekktum listamönnum og þeim sem eru að stíga sín fyrstu skref.“

Café Flóra opnar 1. maí ár hvert og er opin frá 10 á morgnana til 22 á kvöldin.

Þorkell setti saman nokkra einfalda sumardrykki sem hann segir auðvelt að blanda heima. Uppistaðan í þeim öllum er fyrsti drykkurinn, Cointreau Fizz, en möguleikarnir á útfærslum eru margir, eins og dæmin sýna.