Fjölbreytt úrval sólbekkja og frábær þjónusta

Sólsteinar/S.Helgason er langstærsta og öflugasta steinsmiðja landsins. Fyrirtækið framleiðir fjölbreytt úrval vara auk þess að reka eigin verslun með fjölbreyttu vöruúrvali og viðhaldsþjónustu.

Sólsteinar/S.Helgason býður upp á mjög gott úrval af sólbekkjum og borðplötum fyrir allar tegundir húsa, hvort sem um er að ræða heimili, fyrirtæki eða opinberar byggingar. Brjánn Guðjónsson, framkvæmdastjóri fyrirtækisins, segir alla sólbekki og borðplötur frá fyrirtækinu vera úr náttúrusteini.

„Bæði borðplöturnar okkar og sólbekkirnir eru ýmist úr graníti eða marmara auk þess sem við framleiðum líka sólbekki úr íslensku stuðlabergi sem er virkilega fallegt.“

Granít er að sögn Brjáns harðasta steintegundin sem völ er á en með faglegri slípun má ná háu gljástigi. „Þetta er virkilega fallegt efni sem hentar vel í sólbekki og auðvitað sérstaklega vel á borðplötur þar sem hægt er að leggja heita hluti á flötinn, til dæmis heit föt beint úr ofninum. Margir litir eru í boði en svartur hefur lengi verið vinsælasti liturinn. Við bjóðum einnig upp á steypt efni úr kvarts-sandi sem hefur svipaða eiginleika og granít en er þó þéttara í sér. Efnið þarf enga yfirborðsmeðhöndlun og eins og með granítið geta viðskiptavinir valið úr 60 litbrigðum. Við erum með einkaumboð fyrir þetta efni sem kemur frá ítalska framleiðandanum Stone Italiana sem er fyrsti framleiðandinn í heiminum til að vinna úr kvarts-sandi.“

Glæsilegur marmari

Marmari er líka vinsæll enda þykir hann afar tignarlegur steinn. Hann hefur verið notaður í gegnum aldirnar í hallir, kastala og opinberar byggingar. „Marmarinn sem við bjóðum upp á er mjúkur og auðunnin. Vinsælasti liturinn er hvítur með gráum tóni en hann er þó til í mörgum litum.“

Að sögn Brjáns er ítalski marmarinn vinsælasta efnið í borðplötur hjá fyrirtækinu eins og víða annars staðar í Evrópu. „Við seljum ógrynni af honum sem er ekki skrýtið því þetta er glæsilegt efni sem sómir sér vel í hvaða húsi sem er. Þróunin hér á landi virðist vera sú sama og víðast hvar í Evrópu þar sem hann nýtur sífellt meiri vinsælda.“

Sólsteinar/S.Helgason sér einnig um að sérpanta vörur að utan fyrir viðskiptavini sína ef þær eru ekki til í versluninni.

Rúmgóð og falleg verslun

Verslun Sólsteina/S.Helgasonar er á Skemmuvegi 48 í Kópavogi. Þar geta viðskiptavinir skoðað gott vöruúrval í fallegu og björtu húsnæði. Starfsmenn fyrirtækisins eru reynslumiklir og veita viðskiptavinum góð ráð varðandi kaup á sólbekkjum og borðplötum.

„Við bjóðum viðskiptavinum að sjálfsögðu upp á þá þjónustu að mæla fyrir sólbekkjum og borðplötum heima hjá þeim. Við göngum frá öllu frá a-ö og festum vaska eða helluborð í borðplötuna þar sem við á. Það er betra að fagmenn taki á verkinu strax í upphafi og sinni þessari nákvæmnisvinnu svo engin mistök verði gerð síðar í ferlinu. Allt ferlið tekur viku til tíu daga, frá mælingu og þar til borðplata eða sólbekkur er kominn á réttan stað.“ Viðskiptavinir Sólsteina/S.Helgasonar eru í góðum höndum að sögn Brjáns enda valinn maður í hverju rúmi. „Við höfum húsasmiðameistara, steinsmið og fleira gott fólk á meðal starfsmanna okkar. Við leggjum mikla áherslu á vönduð og góð vinnubrögð og viljum vera þekkt fyrir það.“