Mazda með eyðslugrennsta bílaflotann

Toyota er stærsti framleiðandi tvinnbíla og Nissan á stóran skerf í Plug-In tvinnbílum heimsins með hinum vinsæla Nissan Leaf, en það er samt Mazda sem skartar eyðslugrennsta flota bíla allra bílaframleiðenda.

Af 11 stærstu bílaframleiðendum sem selja bíla í Bandaríkjunum stendur Mazda hæst á stalli sem sá framleiðandi sem framleiðir eyðslugrennstu bílana og þá sem menga minnst. Í öðru sæti var Honda, Volkswagen í því þriðja og Subaru í fjórða. Það eru því þrír japanskir bílaframleiðendur og einn þýskur sem fylla fjögur efstu sætin og því ekki nema vona að bílar þeirra seljist vel vestanhafs.

Neðst á listanum er Chrysler/Fiat, rétt fyrir neðan General Motors, en báðir þeir framleiðendur eru bandarískir og virðast þeir seint ætla að læra að framleiða eyðslugranna og smáa bíla. Chrysler/Fiat tókst engu að síður að minnka mest eyðslu bíla sinna og ef það heldur áfram má búast við að fyrirtækið vermi kannski ekki neðsta sætið að ári.

Það merkilega við árangur Mazda er að fyrirtækið hefur sniðgengið tvinnbíla og Plug-In tvinnbíla en treyst á framleiðslu hinna sparneytnu Skyactive véla í bíla sína, með þessum líka fína árangri. Mazda stefnir að sölu 1,7 milljón bíla árið 2016 og verða þá Skyactive vélar í 80% þeirra.