Audi undirbýr mikla framleiðsluaukningu

Audi ætlar að endurvekja framleiðslu bíla sinna í Brasilíu í því augnamiði að velta BMW úr sessi sem stærsti lúxusbílaframleiðandi heims og til að styrkja stöðu sína í S-Ameríku. Audi mun fjárfesta fyrir 27 milljarða króna í verksmiðjunni í Brasilíu, sem hefur framleiðslu á næsta ári. Audi ætlar að ná 30.000 bíla sölu eingöngu í Brasilíu árið 2018, einnig með innfluttum bílum.

Audi telur að eftirspurnin eftir lúxusbílum muni vaxa þar um 170% á næstu 5 árum og að vöxturinn verði einnig mikill í Mexíkó. Ekki ætlar BMW þó að gefa neitt eftir í Brasilíu, en BMW hefur fjárfest fyrir hærri upphæð en Audi í nýrri samsetningarverksmiðju þar, alls fyrir 32 milljarða króna. Þar verða framleiddir 30.000 bílar á ári.

Mercedes Benz er einnig að íhuga að reisa verksmiðju í Brasilíu í samkeppninni við Audi og BMW, sem ætlar að verða hörð á hinum vaxandi markaði í S-Ameríku. Mercedes Benz er í þriðja sæti hvað varðar fjölda seldra lúxusbíla, á eftir BMW og Audi, en ætlar að ná fyrsta sætinu aftur, sem það hafði lengi.

Audi er greinileg á miklu flugi og undirbýr mikla framleiðsluaukningu með nýjum verksmiðjum í Kína og Mexíkó, sem og stækkun verksmiðju sinnar í Gyor í Ungverjalandi. Eftir stækkun hennar verður hægt að framleiða þar 125.000 bíla á ári.