„Þetta snýst um heildarútlitið á módelinu. Allt verður að passa saman og vera í samræmi við þemað, sem í ár er framtíðin," segir Björg Jónsdóttir, framkvæmdastjóri Samfés, um hönnunarkeppnina Stíl sem haldin verður í tólfta sinn á morgun.
Um 200 unglingar frá 58 félagsmiðstöðvum alls staðar af landinu taka þátt í keppninni sem haldin verður í Hörpu. Krakkarnir vinna í tveggja til fjögurra manna hópum og koma sér sjálfir saman um vinnulagið. „Sumir hópar vinna allt saman en aðrir skipta með sér verkum. Svo skilar hver hópur inn vinnumöppu þar sem vinnuferlið er útskýrt," segir Björg.
Samfés eru frjáls félagasamtök félagsmiðstöðva á Íslandi sem tengja saman allar félagsmiðstöðvar landsins. Auk þess að halda hönnunarkeppnina Stíl standa þau árlega fyrir söngkeppni fyrstu helgina í mars og rappkeppninni Rímnaflæði sem fram fer í dag. Þar fyrir utan eru landsmót félagsmiðstöðvanna og Samfestingurinn á þeirra vegum.
„Samfestingurinn er stórt ball og tónleikar í Laugardalshöll þar sem við höfum verið með um 7.500 unglinga undanfarin ár," segir Björg.
