Tvö óskyld mál tengd barnaníði

Lögreglunni á Akranesi bárust tvær kærur vegna kynferðislegrar misnotkunar á börnum, yngri en fimmtán ára, í síðustu viku.

Skessuhorn greindi frá málinu og þar segir að um tvö aðskilin mál sé að ræða. Báðar kærurnar voru lagðar fram hjá lögreglunni í Borgarfirði og Dölum og tengjast þær ekki á neinn hátt, að því er segir í Skessuhorni. Rannsóknardeild lögreglunnar á Akranesi hefur málin til meðferðar.

Lögreglan á Akranesi staðfestir við Fréttablaðið að tvær kærur séu þar til rannsóknar en vill ekki veita upplýsingar um einstök mál. - sv