Fantasíur í kynlífi

Grasið strýkst við sólbrúnt hörundið á stinnum kroppnum og þessi ókunnugi maður sem liggur við hlið þér horfir djúpt í augu þín er þú grípur um…

Fantasíur eru skemmtilegt fyrirbæri. Flestallir fantasera á einhverjum tímapunkti í lífinu en margir eru hræddir við það, oftar en ekki af því að þeir halda að fantasíur og kynferðisleg hegðun fari saman en svo þarf alls ekki að vera. Sumar fantasíur eiga heima í einkarými heilans og þeirra eini tilgangur er að gera okkur kynferðislega æst og auðvelda fullnægingu í kynlífi. Sumar fantasíur langar okkur að framkvæma en þá er mikilvægt að beita heilbrigðri skynsemi til að geta greint á milli þeirra sem hægt er að framkvæma og þeirra sem er það ekki. Það er heldur ekki verra að eiga skilningsríkan og samstarfsfúsan bólfélaga.

Fólk fantaserar um alls konar, bæði vini og kunningja; fyrrverandi og núverandi; frægt fólk og stjórnmálamenn og jafnvel ofurhetjur. Fantasían getur gerst hvar sem er og hvenær sem er. Oftar en ekki er lagt mikið upp úr líkamlegu atgervi elskhugans og umhverfinu í kring. Þá geta sumar fantasíur snúið að „einum snöggum" og bólfélaginn verið fleiri en einn. Ef þig vantar fantasíu þá mæli ég með að lesa erótíska smásögu sem æsir þig og gera svo söguna að þinni í huganum.

Þó fantasíur séu hinn eðlilegasti hlutur þá virðist fólk eiga erfitt með að tala um þær, og veistu hvað? Það er allt í lagi. Fantasíur geta nefnilega verið einkamál og ekki eru þær allar til þess fallnar að deila með öðrum. Því máttu eiga fjöldann allan af fantasíum til að verma þér og það er þitt að velja hvort þú deilir þeim, einni eða öllum, með elskhuganum.

Þú getur upplifað þig ögn berskjaldaða þegar þú byrjar að deila fantasíunni þinni enda ertu að segja frá hugsunum kynlífslogans og að klæmast. Það getur því verið ágætt að byrja smátt og þá á því að segja „dónalegu" orðin upphátt þegar þið kelið. Byrjaðu á því að hrósa: „Mér finnst svo gott þegar þú nuddar/sleikir snípinn."

Svo til að kanna hvort stemning sé fyrir fantasíunni þinni þá getur þú spurt bólfélagann: „Ég var að hugsa um (það sem þig langar að prufa), er það eitthvað sem þú værir til í að prufa?" Virkjaðu ímyndunaraflið og kveiktu á kynlönguninni. Þegar þú hefur komist yfir þennan hól halda þér engin bönd.