Pollrólegir en pirraðir þegar hákarl stal fisknum

Nokkrir vinir sem voru við sjóstangveiðar úti fyrir norðausturströnd Ástralíu urðu vitni að ótrúlegu atviki sem þeir festu á „filmu".

Félagarnir voru við veiðar skammt frá smábænum Weipa í Queensland-fylki. Myndbandið, sem er rétt tæplega tveggja mínútna lang, sýnir einn vinanna kljást við stóran makríl. Skömmu eftir að löndun mistekst kemur hákarl og hreinlega rífur makrílinn í sig. Það er í raun skondið að heyra viðbrögð vinanna því þeir virðast ekki kippa sér neitt mjög upp við þetta og greinilega fyrir löngu orðnir vanir svona hákarlaárás. Það örlaði í mesta lagi fyrir smá pirringi yfir því að hákarlinn hafi stolið makrílnum.

Sjón er söguríkari. Eins og áður sagði er myndbandið stutt en fyrir óþolinmóða þá byrjar hasarinn á 55. sekúndu. Smellið hér til að sjá myndbandið.

trausti@frettabladid.is