Hefur engar áhyggjur af húsbílavatni

Stangveiðimenn telja ástæðu til að óttast að sníkjudýrið Gyrodactylus salaris sem leggst á laxfiska í Noregi og Svíþjóð berist fyrr en síðar með erlendum húsbílum í íslenskt vatnakerfi.

"Á sama tíma og veiðimenn eru látnir sótthreinsa fluguboxin sín streyma til landsins húsbílar erlendis frá með vatn í tönkum til neyslu og notkunar á salernum. Sníkjudýr á borð við Gyrodactylus getur lifað allt að viku tíma við réttar aðstæður án hýsils og því er auðvelt að sjá fyrir sér að húsbílar sem hingað til lands koma geti losað sýkt vatn í veiðiárnar, um leið og vatn bílsins er endurnýjað," segir á vef Stangaveiðifélags Reykjavíkur.

Gísli Jónsson, sérfræðingur hjá Matvælastofnun, segir þessa smitleið gríðarlega ólíklega.

"Ég skoðaði þetta fyrir örfáum árum og menn þekktu engin dæmi þess að húsbílar væru að taka yfirborðsvatn einhvers staðar. Það er þakkarvert að menn skuli vera á tánum en þessar vangaveltur eru það langsóttar að ég hef engar áhyggjur. Ég hef miklu meiri áhyggjur af kjölfestuvatni með skipum sem koma hingað," segir Gísli.