Frábær meðalveiði í Ellliðaánum í sumar

Óhætt er að segja að veiðin í Elliðaánum standi undir ítrustu væntingum í sumar. Á vef Stangaveiðifélags Reykjavíkur sagði frá því á miðvikudag að árnar bæru höfuð og herðar yfir aðrar laxveiðiár hvað snertir veiði á hvern stangardag.

„Í gærkveldi höfðu veiðst 359 laxar í ánum sem er frábær niðurstaða eftir 21. veiðidaginn," sagði á svfr.is. Þetta þýddi að 3,5 laxar koma á land að meðaltali á hverjum degi á hverja stöng sem veitt er á. Daginn sem fréttin birtist bættust við tuttugu veiddir laxar á stangirnar sex samkvæmt tölum Landssambands veiðifélaga. Rímar það mjög vel við aflatölurnar fram að því.

Til samanburðar má taka aflahæstu ánna til þessa samkvæmt nýjustu tölum Landssambandsins frá því á fimmtudaginn. Í Norðurá höfðu þá veiðst 527 laxar á fjórtán stangir. Það eru um 1,7 laxar á hvern stangardag.