Um 43 prósenta minni laxveiði

Laxveiðin í síðustu viku var 43 prósentum lakari en á sama tímabili í fyrra. Núna var veiðin 1.952 laxar samanborið við 3.415 í fyrra. Vikuveiðin var sem sagt 1.463 löxum lakari en í fyrra. Þetta kemur fram í pistli Þorsteins Þorsteinssonar, frá Skálpastöðum í Lundareykjardal, á vef Landssambands veiðifélaga - angling.is.

Um þennan samdrátt í veiðinni segir Þorsteinn:

"Þarna er þó nokkur munur á, og ef ekki bregður fljótlega til batnaðar sýnist stefna í slakara veiðisumar en verið hefur nokkur síðustu árin. Þó er of snemmt að slá nokkru föstu um það. Menn binda vonir við að spáð er vaxandi úrkomu á næstunni," segir Þorsteinn á angling.is.

"Þetta sumarið áttu fyrstu heimtur að berast frá hrygningunni miklu haustið 2008, og síðan áfram næstu tvö árin. Við skulum vona að þau seiði, sem ætlað var að myndu skila sér sem smálax í sumar, hafi ákveðið að dvelja lengur í sjó og mæti sem stórlaxar á næsta ári."

trausti@frettabladid.is