Átta milljarðar til verndar laxastofnum

Orri Vigfússon, formaður Verndarsjóðs villtra laxastofna (NASF), hefur sett sér það takmark að semja við alla sem eiga rétt til netaveiða á laxi við Norður-Atlantshaf. „Ég vil gera sanngjarnan samning við alla sem veiða lax í net", segir Orri í viðtali við breska stórblaðið Financial Times. NASF hefur nýverið gert samning við veiðimenn í þorpinu Mudeford í Dorset og því getur lax í ánum Avon og Stour nú gengið óáreittur fyrir netaveiði til hrygningarstöðva sinna.

Í grein FT segir að samningurinn sé aðeins sá nýjasti af fjölmörgum á þeim 23 árum sem Orri og hans fólk hefur beitt sér fyrir því að kaupa upp netaréttindi veiðimanna. Orri og hans menn hafa nú keypt netaveiðirétt af 85% allra veiðimanna sem slíkar veiðar hafa stundað á Atlantshafslaxi. Sá hópur telur 5.200 manns. Til þess hefur NASF safnað 40 milljónum punda, eða um átta milljörðum íslenskra króna að núvirði, eins og James Pickford, blaðamaður FT, greinir frá í grein sinni.

Netaveiðar þorpsbúa í Mudeford hófust fyrir hundruðum ára segir í grein FT. Árnar, Avon og Stour, eru með þekktari laxveiðiám á Bretlandseyjum enda státuðu þær af gríðarlega stórum laxastofnum allt fram á sjöunda áratuginn þegar þeir hrundu. Algeng veiði á stöng í Avon var vel á annað þúsund laxa um 1970 en árið 2010 veiddust aðeins 73, og er þá stangveiði og netaveiði talin saman.

Hér má lesa meira um verndunarstarf NASF og hér má lesa grein FT.