Sjóbleikjan komin í Breiðdalsá

Fyrir nokkrum dögum veiddust fyrstu sjóbleikjurnar á silungasvæði Breiðdalsár. Þetta kemur fram á heimasíðu Strengja.

Vegna kulda hefur lítið verið reynt að veiða í Breiðdalsá í vor en samkvæmt frétt Strengja lét Heimir Karlsson, gamalreyndur leiðsögumaður við ána, sig hafa kuldann. Hann uppskar þrjár bleikjur, ein var 54 sentímetrar, ein 50 en sú þriðja var eitthvað minni. "Varð hann var við fleiri fiska sem náðu ekki að taka almennilega. En allavega góðar fréttir að bleikjan er mætt á svæðið," segir í frétt Strengja.

Ennfremur segir: "... það voru óvænt að losna stangir á topptíma í ágúst á laxasvæðum í ánni, þar er um að ræða stangir 4. - 7. ágúst, 19. -22. ágúst og 22. -25. ágúst eins og sjá má á vefnum."

Þá er sjálfsagt að benda á það að Sjónvarpið mun næstu þrjá miðvikudaga sýna mynd þeirra bræðra Gunnars Helgasonar og Ásmundar Helgasonar „Leitin að stórlaxinum." Í myndinni eru meðal annars myndskeið frá Breiðdalsá.