Íslenskur fótboltaleikur í farsímann

„Þessi leikur hefur verið til í mörg ár, hefur verið spilaður í fjörutíu manna hópi. En það er fyrst núna að við ætlum að koma með hann fram í dagsljósið enda teljum við okkur þekkja vel það sem drífur þátttakendur áfram,“ segir Sigurður Jónsson, tölvufræðingur og framkvæmdarstjóri tölvufyrirtækisins Digon Games.

Næsta haust setur fyrirtækið á markað tölvuleik sem hefur hlotið vinnuheitið Club Manager. Guðni Bergsson, fyrrum fyrirliði íslenska landsliðsins, er ráðgjafi við gerð leiksins en hann er í grunninn til knattspyrnuleikur þar sem menn skapa sit eigið lið eins og margir þekkja úr tölvuleikjunum Football Manager. Ólíkt honum, þar sem menn keppa aðallega við tölvur, etja menn kappi við aðra spilara í Club Manager.

„Þannig að menn geta gert góð viðskipti þegar þeir eru að skiptast á leikmönnum,“ segir Sigurður en leikurinn er hugsaður fyrir netið ásamt því að notendur geta spilað hann á símann sinn, gegnum Facebook og önnur samskiptaforrit. „Þetta á að vera ókeypis leikur þannig að þú átt ekki að geta keypt þér árangur fyrir raunverulegan pening eins og verið hefur um suma leiki á netinu.“

Sigurður segir að menn hafi tekið leikinn misalvarlega þegar hann var spilaður í hinum þrönga vina-hópi, sumir hafi orðið mestu mátar en hjá öðrum hafi soðið uppúr og jafnvel legið við vinslitum. „Einn tók við liði af öðrum og gat því ekki skipt um nafn. Þegar hann var búinn að spila leikinn í nokkurn tíma hafði hann pantað sér bílnúmer með nafni liðsins síns,“ segir Sigurður en rétt er að halda því til haga allir leikmenn og deildir eru tilbúningur, annað væri fokdýrt réttindamál.