Vann eftirsótt verðlaun

Vöruhönnuðurinn Brynjar Sigurðarson vann eftirsótt hönnunarverðlaun í Frakklandi á dögunum. Brynjar fékk verðlaunin fyrir ljós og Húsgögn frá Vopnafirði, línu sem hann gerði fyrir lokaverkefni sitt í vöruhönnun frá Listaháskóla Íslands árið 2009. Brynjar tók þátt í sýningu ungra hönnuða í Villa Noailles í franska strandbænum Hyères í suðurhluta Frakklands.

„Villa Noailles er hálfgerð félagsmiðstöð þar sem haldin er hönnunarhátíðin Design Parade árlega. Partur af því er samkeppni ungra hönnuða," segir Brynjar við blaðamann um leið og hann stígur upp í rútu suður á bóginn. En honum var boðið að taka þátt í námskeiði á vegum skóframleiðandans Camper á Majorka. Var það hluti verðlauna sem hann hlaut á hönnunarsýningunni. Brynjar var valinn úr hópi fjölda ungra hönnuða í tíu manna úrtak sem tók þátt í sýningunni í Villa Noailles. „Ég kynnti verkin mín fyrir hálfgerðri dómnefnd og þeir völdu mig og annan strák sem sigurvegara þessarar keppni."

En hver voru verðlaunin? „Ég fékk styrk upp á 5.000 evrur til að búa til hlut fyrir gallerí Kreo í París," upplýsir Brynjar en galleríið hefur alþjóðlegan einkarétt á sýningu nokkurra þekktra ljósa sem framleidd hafa verið í takmörkuðu upplagi. Brynjar telur upp fleiri verðlaun. „Síðan fæ ég rannsóknarstyrk til að vinna með glerfyrirtækinu Cirva í Marseille. Þangað fer ég á næsta ári og fæ að vinna með þeim og gera tilraunir með gler. Í lokin verður svo útbúið verk eftir mig," segir Brynjar sem einnig fékk rannsóknarstyrk hjá Sèvres, keramíkfyrirtæki í París. „Verðlaunin felast í því að ég fæ skemmtileg verkefni til að vinna með."

Verðlaunaár Brynjars endar á því að hann fær að halda einkasýningu í Villa Noailles á Design Parade í júlí á næsta ári.

Brynjari, sem stundar nú mastersnám í vöruhönnun í Sviss, hefur gengið vel í grein sinni undanfarið en í lok síðasta árs var hann valinn til að hanna forsíðu hönnunartímaritsins Wallpaper.

Blaðamaður komst á snoðir um að vorverkefni Brynjars nú hafi verið valið eitt það besta í Evrópu úr hundruðum annarra af hinu þekkta hönnunar- og arkitektúrtímariti Blueprint. Brynjar er spurður um þetta: „Já er það? Það er gaman að því," segir hann glaðlega. „Ég vissi að það væri möguleiki."

martaf@frettabladid.is