Ævintýri við erfiðar aðstæður

Þrátt fyrir grátlegar aðstæður undanfarið hafa veiðimenn verið að reka í stórlaxa í Nesi sem venja er. Hafa fimm laxar á bilinu 20-25 pund veiðst á sl. fjórum dögum.

Að sögn Árna Péturs Hilmarssonar hefur verið vetrarveður fyrir norðan og frost verið nokkuð að nóttu til. Um hádegisbil í dag tók hins vegar að hlýna og útlit er fyrir góðar aðstæður það sem eftir lifir vertíðar í Aðaldalnum ef langtímaspár rætast. Veitt er til 20. september í Nesi, og því gæti síðasta vikan orðið mjög góð.

Þó má ekki skilja sem svo að ördeyða hafi verið nyrðra. Venju samkvæmt hafa heppnir veiðimenn sett í draumalaxinn og sumir jafnvel verið svo lánsamir að landa þeim!

Síðustu fjóra daga hafa fimm laxar frá 21-25 pund veiðst á Nesveiðum, í bland við smærri laxa. Þrjá þeirra má sjá hér að neðan, en á efstu myndinni má sjá 12.5 kg lax sem veiddist í Sandeyrarpolli fyrir fjórum dögum. Var sá lax búinn að stríða veiðimönnum dagana á undan. Á næstu mynd fyrir neðan (t.v) þá má sjá veiðimann með 11 kg lax úr Grástraumi og loks á neðstu myndinni (t.h) 11.5 kg lax úr Neðri-Grástraumi sem veiddist í morgun.  Að auki veiddust tveir í þessum stærðarflokki á Knútsstaðatúni og Hólmavaðsstíflu.  Allir laxarnir fóru í háfa til vigtunar.