Heitar flugur frá Veiðiflugum

Núna þegar stórir laxar eru að koma á land er auðvitað alltaf spurt hvað fiskurinn tók. Margir eiga sér uppáhalds haustflugur og sumar þeirra eru sígildar en lítið notaðar að mér finnst. Má þar nefna flugur eins og White Wing sem er frábær fluga í september veiðina þegar rökkva tekur á kvöldin. Sama má segja um Thunder & Lighting, Half & Half, Iða, Krafla svo að nokkrar séu nefndar. En tvær flugur hafa klárlega öðlast sess á þessu ári sem tískuflugur meðal þeirra sem eru að reyna ná stórlaxi þetta árið.

Arndilly Fancy er önnur þeirra (sjá efri mynd). Þetta er veiðileg fluga og veiðin að sögn þeirra sem nota hana mikið. Hin flugan er Græna Druslan eftir Klaus Frimor. Grænn litur er lítið notaður í nýjustu hnýtingarnar en var vinsæll litur hér á árum áður. Þær flugur sem menn veiddu oft vel á voru t.d. Green Highlander, Green Lorens sem eru eins og nöfnin benda til vel grænar.

Annars hafa sumir haldið því fram að það sé misjafnt eftir ám hvaða litur gefi vel. Spurning um að prófa þetta ítarlega í næsta veiðitúr, annars er það nú oftast þannig að menn hnýta undir það sem þær hafa trú á, sama hvernig flugan lítur út.