Þrír ættliðir í veiði taka þrjá laxa á sama klukkutímanum

Hér er frétt ásamt mynd sem við fengum senda í dag frá Gunnari Valþórssyni:

"Hún er tekin í Laxá á Skógarströnd við Hvammsfjörð í síðustu viku. Þrír ættliðir lentu í góðri veiði og landaði hver sínum fyrsta laxi sumarsins á sama klukkutímanum. Það sem gerir þetta sérstaklega skemmtilegt er yngsti ættliðurinn, Óskar Hrafnsson, sem er þarna ásamt föður sínum og afa, er aðeins sex ára en samt sem áður er ekki um Maríulax að ræða. Sá var veiddur á sömu slóðum í fyrra þegar veiðimaðurinn var fimm ára. Er hann búinn að einsetja sér að taka næsta lax á flugu eins og hinir eldri. Fékk hann sína fyrstu flugustöng í ferðinni og æfði stíft, setti meðal annars í einn nýgenginn.

Faðirinn er Hrafn Þórðarson og afinn er Þórður Óskarsson. Það ber ekki mikið á þessari litlu laxveiðiperlu, Laxá á Skógarströnd, en hún hefur gefið af sér á annað hundrað laxa á bestu árum. En eins og aðrar ár á Skógarströnd þá ræður úrkoma miklu um hvernig veiðist. Þennan dag hafði rignt vel á undan og áin hækkað um tvö fet. Þetta voru jafnframt fyrstu laxar sumarsins og því ansi skemmtileg stund".

Við þökkum kærlega fyrir myndina og fréttina og minnum á að þið getið sent okkur ykkar veiðifréttir og veiðimyndir á kalli@365.is