Góður dagur í Elliðaánum í gær en rólegt í morgun

Mjög góður ágústdagur var í gær í Elliðaánum, þann 17. þm. Alls komu 19 laxar upp úr ánni og sá stærsti 78 cm. langur - hængur úr Teljarastreng. Nær allir laxarnir veiddust á flugu og flestir á efri svæðum árinnar. 9 laxar komu á morgunvaktinni en 10 seinni partinn.

Í morgun var aftur á móti mikið rólegra.  Veðrið hefur haft þar mikil áhrif en aðeins 1 lax kom á land í morgun og var það í Kerlingaflúðunum.  Það er mikið af laxi í öllum helstu veiðistöðum frá stíflu og upp að Höfuðhyl.  Kisturnar, Hraun, hundasteinar, Fljót og Mjóddir voru pakkaðar af laxi en hann var líka mjög styggur í þessu veðri.

Elliðaárnar eru nú komnar í 1.030 laxa. Laxar gengnir í gegnum teljarann eru tæplega 2.000 talsins. Útlit er fyrir að árnar verði í meðaltali sl. áratuga sem er liðlega 1.140 laxar.