Tólf ára strákur fór hölu í höggi í Eyjum

Daníel Ingi Sigurjónsson fór holu í höggi á golfvellinum í Vestmannaeyjum í gærmorgun. Daníel sem er aðeins tólf ára gamall náði draumahögginu á 12. braut vallarins, par 3 holu. Á fréttasíðunni Eyjafrettir.is kemur fram að Daníel Ingi sé líklega yngsti kylfingurinn til þess að fara holu í höggi í Eyjum.

Nánar er fjallað um afrekið á Eyjafrettir.is. Fram kemur að Sigurjón faðir Daníels hafi sjálfur farið holu í höggi en það gerði hann einmitt á sömu braut og sonur hans.

Það er ekki einsdæmi að svo ungir kylfingar nái draumahögginu á Íslandi. Síðastliðið sumar fór hinn tíu ára gamli Kristófer Daði Kárason holu í höggi á meistaramóti GO. Sumarið 2008 gerði hinn 10 ára gamli Helgi Snær Björgvinsson slíkt hið sama á golfvelli Keilis.

Í samtali Vísis við Einherjaklúbbinn, félag þeirra sem ná draumahögginu, fengust þær upplýsingar að um 100 manns fara holu í höggi á ári hverju hér á landi.