Engin lax gengin í Leirvogsá?

Svo virðist sem að lax sé ekki genginn í Leirvogsá. Í það minnsta hefur enginn slíkur verið færður til bókar fyrstu þrjá daga tímabilisins.

Júnímánuður hefur svo sem aldrei verið tími Leirvogsár, en hins vegar er óvenjulegt að lax skuli ekki hafa veiðst á þessum tíma, í það minnsta í seinni tíð.

Teljarinn ofan við Gömlu brú er á núlli, og þó svo að lax hafi undanfarin ár verið genginn í Brúargrjótinn virðist það ekki tilfellið enn sem komið er. Að sögn Garðars Jóhannssonar sem stóð vaktina í morgun var ekki að sjá að fiskur væri genginn, en hann er alvanur ánni.

Hið sama er að segja um Andakílsá. Þar virðist lax vera seinna á ferðinni en undanfarin ár og segja vanir Andakílsármenn að nú sé ástandið eðlilegt, ekki sé sanngjarnt að miða við þá miklu veiði sem verið hefur undanfarin sumur.

Þetta verður að teljast meira en lítið skrítið þar sem lax er farin að veiðast vel í Elliðaánum og menn búnir að sjá laxa í Korpu.

Birt með góðfúslegu leyfi SVFR