Vegleg villibráðarveisla

Hún er ekki falleg en rosalega góð og saðsöm," segir Oddný Elín Magnadóttir, húsfreyja á Kambsvegi, um forláta gæsasteik sem hún gefur hér uppskrift að. Í fjölskyldu Oddnýjar hefur skapast hefð fyrir því að borða hvers kyns villibráð á jólum. „Frá því að börnin voru lítil hefur tíðkast að hafa rjúpu á aðfangadag og gæs á milli jóla og nýárs," segir hún og minnist þess að bann við rjúpnaveiði um árið hafi næstum sett allt úr skorðum þau jólin. „Dóttur minni fannst að við gætum allt eins haft hamborgara í matinn fyrst rjúpurnar vantaði," segir hún og hlær.

Að sögn Oddnýjar taka fjölskyldumeðlimirnir þátt í matargerðinni og verkaskiptingin er skýr. „Maðurinn minn, synir og tengdasonur veiða í matinn og þegar þeir hafa gert að bráðinni tek ég við," upplýsir hún og er sátt við að þurfa ekki að reyta gæsina.

En hvað er gott með?

„Ávaxtafylling og svo salat úr eplum, perum, döðlum, selleríi og sýrðum rjóma, sykurbrúnaðar kartöflur, gljáðar sykurbaunir eða gul­rætur og villibráðarsósa. Heimalöguð aðalbláberjasulta setur punktinn yfir i-ið.“

1 gæs, reytt og sviðin

Ávaxtafylling

2 plómur skornar í litla bita

1 epli skorið í bita

nokkrar sveskjur

þurrkaðar apríkósur

salt

pipar

skvetta af púrtvíni

Allt sett í skál, kryddað og púrtvíni hellt yfir. Geymt í kæli yfir nótt.

Hreinsið gæs vel að innan og skellið fyllingu í, lokið opi með seglgarni. Setjið í ofn á 180-200 gráður í 15- 20 mínútur þar til gæs er gullinbrún, lækkið í 140 gráður og steikið í 2 tíma. Ausið yfir á 30 mínútna fresti safa og fitu sem lekur af henni.

Bláberjasósa

1 skalottlaukur smátt saxaður

1 msk. smjör

lárviðarlauf

ferskt rósmarín

ferskt blóðberg

1 dl rauðvín

1 dl púrtvín

1 dl bláberjasulta

3 dl villibráðarsoð

sósujafnari

fersk bláber

50 g kalt smjör

Mýkið lauk í smjöri með kryddi, bætið víni út í ásamt sultu og sjóðið niður um helming. Bætið soði við og þykkið. Bætið köldu smjöri við og hrærið varlega. Látið ekki sjóða. Setjið fersk bláber í sósuskál og hellið sósu yfir.

Hunangsgljáðar gulrætur

Skerið gulrætur í strimla. Bræðið smjör og hunang á pönnu og látið krauma. Setjið gulrætur á pönnu og steikið þar til þær eru meyrar. Bætið trönuberjum við og blandið þar til berin eru orðin mjúk.