Átu þurrkað nautakjöt og snakk í hvert mál

Lið Vilhelms Antons Jónssonar og Sverris Þór Sverrissonar etur kappi við tvíeykið Auðun Blöndal og Gillz í sérstökum þrautakappakstri yfir endilöng Bandaríkin. Keppnin verður sýnd á föstudagskvöldum á Stöð 2 en við sögu koma einkennileg enskukunnátta Sveppa, fellibylur og afslappaðir Suðurríkjamenn.

Fyrirkomulag keppninnar er þannig að liðin keyra hvort úr sinni áttinni og eiga að hafa upp á leynigesti í Mall of America í Minneapolis. Liðin leysa þrautir á leiðinni og fá stig fyrir að klára þær. Vilhelm var reyndar á leiðinni út í íslenskar óbyggðir þegar Fréttablaðið náði tali af honum, með riffil á bakinu að fara skjóta gæsir.

„Þetta var snilldarferð,“ segir Vihelm, sem einhverjir kynnu að telja gáfumennið í þessum kvartett.

„Þeir eru nú ekki allir jafn vitlausir þótt sumir þeirra séu það, þetta var bara mikil mannfræðistúdía fyrir mig, að kynnast þessum tegundum í sínu rétta umhverfi.“

Vilhelm hafði reyndar áður komið til Ameríku, verið bæði í New York og Washington. Ferðin gekk hins vegar ekki út á hinar dæmigerðu amerísku stórborgir heldur þau svæði sem fæstir ferðalangar komast í kynni við.

„Þetta var mikill akstur, það lágu kannski sex til sjö hundruð kílómetrar að baki á hverjum degi enda keyrðum við í gegnum sjö eða átta ríki á aðeins ellefu dögum,“ útskýrir Vilhelm.

Hann og Sveppi héldu sér uppi á þurrkuðu nautakjöti og suðurríkjasnakki og Vilhelm viðurkennir að hann hafi aðeins bætt á sig í ferðinni enda hafi fá tækifæri gefist til að hreyfa sig almennilega. Suðurríkjamenn komu honum mest á óvart.

„Þeir eru alveg ótrúlega gestrisnir og ákaflega afslappaðir, það getur tekið marga klukkutíma að fara út í búð.“

Að sögn Vilhelms gekk samstarf hans og Sveppa ákaflega vel þótt „maskínuliðið“ eins og Villi kallar framleiðandann og tökumanninn hafi stundum verið með leiðindi.

„Ég hélt uppi stuðinu með spurningakeppni og skemmtilegri tónlist þegar útvarpið ofbauð manni,“ segir Vilhelm og bætir því við að hann hafi verið guðs lifandi feginn að þurfa ekki að sitja í bíl með þeim Audda og Gillz. „Já, tónlistin sem þeir hlusta á gæti drepið fullvaxta karlmann úr leiðindum.“

Og þótt ferðin hafi að mestu leyti gengið vel fyrir sig voru þeir félagar stöðvaðir af lögreglunni í þrígang. Þar kom hins vegar sérkennileg enskukunnátta Sverris Þórs að góðum notum.

„Það er ekki hægt að sekta krullhærðan og málhaltan karlmann,“ segir Villi. Þá hafi fellibylur sem reið yfir Houston einnig verið eftirminnilegur og þá sérstaklega þegar þeir flugu út úr honum, umkringdir af þrumum og eldingum.

„Við Sveppi erum ákaflega flughræddir menn og þetta var síður en svo þægileg flugferð.“ Blásið verður til sérstaks frumsýningarhófs á Players í kvöld klukkan sjö en Vilhelm verður ekki viðstaddur vegna gæsaveiðanna.

freyrgigja@frettabladid.is