Alþingi má ekki vera verkfæri framkvæmdavaldsins

Meginniðurstöður þingmannanefndar sem fjallaði um rannsóknarskýrslu Alþingis er að það þarf að auka sjálfstæði þingsins gagnvart framkvæmdavaldinu og gera stjórnsýsluna faglegri. Alþingi má ekki vera verkfæri í höndum framkvæmdavaldsins. Þetta segir Atli Gíslason, formaður þingmannanefndarinnar. Umræða um skýrslu nefndarinnar hófst klukkan hálfellefu í morgun.

Atli segir meðal annars í ræðu sinni að mikilvægt væri að endurreisa virðingu Alþingis. Hann sagði að öllum þeim sem hefðu komið að vinnu nefndarinnar hefði reynst það erfitt að takast á við það verkefni sem laut að ráðherraábyrgð. Ekki síst hefði það verið erfitt fyrir þá nefndarmenn sem þurftu að fjalla um ábyrgð flokkssystkina sinna sem þeir hefðu unnið með í áraraðir eða jafnvel áratugaraðir.

Atli sagði að aðalverkefni nefndarinnar hefði verið vinna við skýrslu nefndarinnar, sem lýtur að því hvernig hægt er að bæta vinnubrögð í stjórnsýslunni. Ákvörðun um ákærur vegna ráðherraábyrgðar hefði verið aukaafurð.