Rétt að fresta þjóðaratkvæðagreiðslu ef skýrslan berst ekki í tíma

Steingrímur J. Sigfússon, fjármálaráðherra, telur rétt að fresta þjóðaratkvæðagreiðslu um Icesave ef ekki verður búið að birta skýrslu rannsóknarnefndar Alþingis fyrir kjördag. Hann telur fullvíst að skýrslan varpi frekara ljósi á Icesave málið.

Til stóð að birta skýrslu rannsóknarnefndar Alþingis um næstu mánaðamót. Í gær var hins vegar tilkynnt að skýrslan komi ekki út fyrr en í fyrsta lagi í lok febrúar. Fyrirhuguð þjóðaratkvæðagreiðsla um Iceasave á einmitt að fara fram fyrsta laugardaginn í mars.

Rætt var um málið á ríkisstjórnarfundi í morgun. „Það voru sterk sjónarmið uppi að skýrslan þurfi að vera komin fram ef að í henni eru upplýsingar sem að tengjast þessu máli þá væri afar óheppilegt að kosningin hefði farið fram rétt áður," segir Steingrímur. „Það væri þá upplýsingar sem almenningur hefði rétt á að hafa í höndum 3.30 persónulega finnst mér sjálfum að það sé ótækt ef að á leiðinni séu mikilsverðar upplýsingar eða gögn sem almenningur hefði rétt á að hafa til skoðunar áður en að kosningin fer fram."

Frestun kosningadags á ekki samkvæmt Steingrími að hafa áhrif á utankjörfundaratkvæðagreiðslu sem hefst á fimmtudag. Hann segir bagalegt birting skýrslunnar dragist og telur víst að hún muni varpa frekari ljósi á Icesave málið.

„Þannig að það er ástæða til að ætla að minnsta kosti samhengi hlutanna skýrist í skýrslunni." Hann óttast ekki óeirðir í kjölfar útgáfu skýrslunnar og segist hafa fulla trú á því að menn skoði þetta og það eigi ekki að þurfa „valda uppþotum eða neinu slíku."