Obama: Tiger verður enn frábær kylfingur

Tiger Woods snýr aftur á golfvöllinn í næsta mánuði þegar hann keppir á Masters-mótinu í golfi. Colin Montgomerie, fyrirliði evrópska Ryder-liðsins, fagnar endurkomu hans.

„Hans hefur klárlega verið saknað, bæði af kylfingum og áhorfendum. Öllum hlakkar til að sjá hann," segir Montgomerie.

Fjölmargir hafa tjáð sig um endurkomu Tiger Woods en þar á meðal er sjálfur forseti Bandaríkjanna, Barack Obama.

„Tiger hefur horfst í augu við að hann sveik fjölskyldu sína. Það er persónulegt mál sem hann einn getur leyst. Ég vona að þau hafi unnið í sínum málum og er viss um að hann verður enn frábær kylfingur," sagði Obama við Fox fréttastöðina.