Björgvin vann Einvígið á Nesinu

Björgvin Sigurbergsson úr Keili vann sigur á Einvíginu á Nesinu á Seltjarnarnesinu í dag. Mótið er haldið til styrktar langveikum börnum og er DHL fyrirtækið aðalstyrktaraðili mótsins nú eins og í öll skiptin síðan að það var haldið í fyrsta sinn 1997.

Björgvin vann þetta sama mót 2001 og er þetta í annað sinn sem hann vinnur þennan titil.

Bráðabana þurfti til að fá fram úrslit en Björgvin lagði heimamanninn Ólaf Björn Loftsson að velli. Guðmundur Rúnar Hallgrímsson úr GS varð í þriðja sætinu.