Mark Pálma Rafns í byrjun dugði Stabæk skammt

Aalesund vann Stabæk 3-1 á heimavelli í dag og sló norsku meistaranan út úr 8 liða úrslitum norska bikarsins. Pálmi Rafn Pálmason kom Stabæk í 1-0 eftir aðeins átta mínútna leik en Aalesund jafnaði leikinn í fyrri hálfleik og tryggði sér síðan sigurinn með tveimur mörkum á síðustu tólf mínútunum.

Pálmi Rafn skoraði með góðu skoti af nærstöng eftir skyndisókn og fyrirgjöf frá Espen Hoff. Pálmi Rafn lék allan leikinn í framlínu Stabæk.

Aalesund var þar með fyrsta liðið til þess að tryggja sér sæti í undanúrslitum bikarsins en liðið er sem stendur í 10. sæti norsku úrvalsdeildarinnar sex sætum neðar en Stabæk-liðið.