Landsliðsmennirnir ánægðir með Tólfuna - gáfu 150 miða á Georgíuleikinn

Leikmenn A-landsliðs Íslands í knattspyrnu voru ánægðir með stuðningssveit íslenska landsliðsins og þökkuðu Tólfunni fyrir frábæran stuðning á leiknum gegn Norðmönnum á laugardaginn. Í þakklætisskyni ákváðu leikmennirnir að gefa liðsmönnum Tólfunnar 150 miða á vináttulandsleikinn við Georgíu á morgun.

Styrmir og Binni eru tveir af aðalsprautum Tólfunnar og mættu þeir félagar á æfingu hjá landsliðinu á Laugardalsvelli á gær. Þar afhentu landsliðsmennirnir Heiðar Helguson og Grétar Rafn Steinsson miðana til þeirra Tólfufélaga.

„Öflugur stuðningur áhorfenda getur skipt sköpum í landsleikjum. Þessu gera leikmenn landsliðsins sér grein fyrir og vilja þeir koma á framfæri þakklæti til allra þeirra sem hafa lagt leið sína á völlinn á leikina í nýliðinni undankeppni HM 2010," sagði í frétt á heimasíðu Knattspyrnusambandsins.