Atvinnuleysi eykst í Bandaríkjunum

Atvinnuleysi mældist 6,1 prósent í síðasta mánuði, samkvæmt nýjustu tölum bandarísku vinnumálastofnunarinnar, sem birtar voru í dag. Þetta er 0,4 prósentustiga aukninga á milli mánaða en atvinnuleysið hefur ekki verið jafn mikið í tæp fimm ár.

Tölurnar þykja sýna að mjög sé að hægjast á bandarísku efnahagslífi. Því til staðfestingar eru vísbendingar um breytt neyslumynstur hjá neytendum vestanhafs en þeir sækja í síauknum mæli í ódýrari vörur.

Samkvæmt upplýsingum vinnumálastofnunarinnar bandarísku misstu 84 þúsund manns vinnuna í mánuðinum. Það er níu þúsund fleiri en menn höfðu reiknað með. Til samanburðar misstu 60 þúsund manns vinnuna í júlí en 100 þúsund í júní.

Niðurstaðan þykir nokkur vonbrigði enda höfðu menn spáð óbreyttu atvinnuleysi á milli mánaða, samkvæmt fréttastofu Reuters. Fréttastofan bætir við að tölurnar geti valdið svartsýni í röðum fjárfesta enda bendi flest til þess að gengi hlutabréfa lækki almennt í Bandaríkjunum í dag, fimmta daginn í röð.