Akstursíþróttamaður ársins spáir Hamilton titlinum

Ragnar  Róbertsson sem var kjörinn akstursíþróttamaður ársins á hófi Akstursíþróttanefndar ÍSÍ um síðustu helgi spáir Lewis Hamilton meistaratitilinum í lokamótinu  í Formúlu 1 um helgina.

Ragnar var kjörinn í hófi á Akueyri um helgina þar sem flestir meistarar íslenskra akstursíþróttamanna voru samankomnir til að taka á móti meistaratitlum sínum. Ragnar hefur keppt í torfæru í mörg ár og vann fjölmörg mót hér heima og á Norðurlöndum.

Rætt verður um lokaslaginn í Formúlu 1 frá ýmsum hliðum í þættinum Rásmarkið á Stöð 2 Sport í kvöld kl. 20.00. Ragnar verður gestur þáttarins og Alexander Kárason sem undirbýr sig fyrir komandi vélsleðavertíð. Báðir eru Formúlu 1 áhugamenn til margra ára.

Ragnar keppti í ellefu torfærumótum á árinu, í Noregi, Svíþjóð, Finnlandi og Íslandi og náði að sigra þau öll nema eina en í þeirra keppni endaði hann í öðru sæti. Með þessum árangri tryggði hann sér Heimsbikarmeistarann, Norðurlandameistarann og Noregsmeistaratitil í flokki sérsmíðaðra götubíla. Ragnar endaði einnig í þriðja sæti til Íslandsmeistara þrátt fyrir að hafa einungis tekið þátt í tveimur keppnum í Íslandsmótinu hér heima.

Ragnar hefur fylgst með Formúlu 1 frá því hún byrjaði í sjónvarpi hér á landi, en segist ekki styðja neinn sérstakan ökumann. Hallast frekar á að fylgjast með liðunum og tækninni í krimgum Formúlu 1.

"Ég spái Lewis Hamilton titlinum, hann fer varlega og man örugglega hvað gerðist í fyrra. Það er spáð rigningu alla helgina og það getur hvað sem er gerst í tímatökunum og keppninni af þeim sökum", sagði Ragnar,

"Ætli við getum ekki sagt að Kimi Raikkönen kveðji titilinn með sigri, en hann náttúrulega hleypir samt Felipe Massa framúr. Ferrari menn verða trúlega fremstir. Svo gæti Fernando Alonso á Renault vel unnið ef rignir. Það er eiginlega ómögulegt að spá. En Hamilton tekur titilinn."

Lokamótið í Formúlu 1 verður í Brasilíu og verður sýnt beint frá öllum æfingum, tímatöku og kapakstri á Stöð 2 Sport. Brautarlýsingu má skoða hér.