Fjárfestar sáu rautt í dag

Helstu hlutabréfavísitölur beggja vegna Atlantsála féllu um tvö prósent og meira í dag. Óbreytt stýrivaxtastig á evrusvæðinu og í Bretlandi auk vísbendinga um versnandi horfur í efnahagsmálum í Evrópu ollu falli á helstu hlutabréfum í álfunni.

Í Bandaríkjunum ollu neikvæðar fréttir úr smásöluverslun og vísbendingar um breytt neyslumynstur því að fjárfestar urðu svartsýnir. Þá bætti ekki úr skák að atvinnuleysi hefur ekki verið meira síðan í nóvember árið 2003.

Bloomberg-fréttastofan hafði eftir fjármálasérfræðingum í kvöld að bandarísk stjórnvöld og seðlabankinn þar í landi yrðu að grípa í taumana til að stemma stigu við þeim þrengingum sem bandarískar fjármálastofnanir standi frammi fyrir, svo sem með því að veita auknu fé til fjármálafyrirtækja. Er þá fátt eitt nefnt.

Dow Jones-hlutabréfavísitalan féll um þrjú prósent í dag og Nasdaq-vísitalan um 3,2 prósent. Þetta er fjórði lækkunardagurinn í röð vestanhafs. Þá er fallið í samræmi við þróun mála á evrópskum fjármálamörkuðum í dag.

Íslenska Úrvalsvísitalan um 1,18 prósent í dag en það er annar dagurinn í röð sem hún lækkar um rúmt prósentustig.