Íslenskur tölvuleikur hlaut norrænan styrk

Átta ný verkefni sem tengjast þróun tölvuleikja hlutu styrk í síðustu umferð styrkveitinga úr Norrænu tölvuleikjaáætluninni. Þeirra á meðal er "Vikings of Thule", sem er þróað af Gogogic ehf. á Íslandi fyrir PC. Hlýtur verkefnið 400.000 danskar kr. í styrk eða sem svarar til um 8 milljónum kr..

Fjallað er um málið á vefsíðunni norden.org. Þar segir að sérfræðingahópruinn mat þær 63 umsóknir sem bárust í annari umferð þróunarstyrkja til norræna tölvuleikjageirans. Niðurstaða þeirra var að þeim 3 milljónum danskra króna sem voru til ráðstöfunar, skyldi úthlutað til eftirfarandi sjö nýrra tölvuleikjaverkefna auk hins íslenska:

"Aquatic Ambience", sem er þróað af Chiralion Oy (Finnlandi) fyrir ýmsar tegundir farsíma. Hlýtur 300.000 dkr. í styrk.

"Boingo", sem er þróað af Black Drop Studios AB (Svíþjóð) fyrir PC og Xbox 360. Hlýtur 300.000 dkr. í styrk.

"Brothers", sem er þróað af af The Story Lab AB (Svíþjóð) fyrir Xbox 360 og PlayStation 3. Hlýtur 500.000 dkr. í styrk.

"Furiae - Uppvaknandet", sem er þróað af Resolution Interactive AB (Svíþjóð) fyrir Nintendo DS. Hlýtur 300.000 dkr. í styrk.

"IloMilo", sem er þróað af Global Southend Productions AB (Svíþjóð) fyrir Xbox Live, PlayStation Network, PC og farsíma. Hlýtur 500.000 dkr. í styrk.

"Invasion Europe", sem er þróað af Sauma Technologies Oy (Finnlandi) fyrir PC. Hlýtur 400.000 dkr. í styrk.

"SuperDoodler", sem er þróað af Earthtree Media AS (Noregi) fyrir Nintendo DS. Hlýtur 400.000 dkr. í styrk.

Um ákvörðunina segir sérfræðingahópurinn :„Gæði umsóknanna hefur aukist mikið með árunum og eru þau nú jafnari en nokkru sinni. Við væntum þess þó að í framtíðinni verði verkefnin enn betur úr garði gerð á þremur megin sviðum, þ.e. viðskiptaáætlun, leikútfærslu og grafík".

Norræna tölvuleikjaáætlunin hófst árið 2006 og er þetta þriðja starfsár hennar af sex. Áætlunin leggur áherslu á að bæta aðgang norrænna tölvueikjanotenda að norrænum tölvuleikjum og eru styrkirnir mikilvægur þáttur í því starfi.