Kaupþing niður í Svíþjóð

Gengi hlutabréfa í Kaupþingi, sem skráð eru á markað í Stokkhólmi í Svíþjóð, hefur lækkað um 0,47 prósent í dag. Fall á bandarískum hlutabréfamarkaði í gær smitaði út frá sér um allan heim í dag. Helsta skýringin á fallinu stafar af efasemda fjárfesta um að björgunaráætlanir bandarískra stjórnvalda muni takast. Vísa þeir til þess að aðgerðirnar séu afar kostnaðarsamar og geti fellt gengi bandaríkjadals. Það geti svo aftur aukið líkurnar á því að samdráttarskeið renni upp vestanhafs. Það muni svo smita út frá sér í alþjóðahagkerfið. Þrátt fyrir að Nikkei-vísitalan í Japan hafi hækkað um 1,4 prósent í dag lækkuðu vísitölur víða í Asíu. Þá hefur FTSE-vísitalan í Bretlandi fallið um 2,15 prósent, Dax-vísitalan í Þýskalandi lækkað um 0,98 prósent og CAC-40 vísitalan í Frakklandi lækkað um 1,82 prósent. Fall er á helstu norrænu mörkuðum en vísitölurnar hafa fallið um 1,98 til 2,64 prósent. Mest er fallið í kauphöllinni í Helsinki í Finnlandi en minnst í kauphöllinni í Ósló í Noregi.