Fjárfestar sáttir með sölu á Lehman Brothers

Gengi hlutabréfa hækkaði almennt í Bandaríkjunum í dag eftir að spurðist út að stjórnendur bandaríska fjárfestingabankans Lehman Brothers ynnu nú að því hörðum höndum að selja hann að mestu leyti eða öllu og forða honum með því móti frá gjaldþroti.

Gengi bréfa í bankanum féll um 42 prósent í dag og hefur því fallið um rúm 70 prósent í vikunni. Richard Fuld, forstjóri bankans, sem er sá fjórði umsvifamesti í Bandaríkjunum, hefur þráfaldlega sagt stöðu bankans góða. 

Stjórnendur sáu sig hins vegar nauðbeygða í gær til að birta ársfjórðungsuppgjör fyrr en áætlað var til að sýna stöðu hans. Þar kom fram að bankinn tapaði 3,9 milljörðum bandaríkjadala á þriðja ársfjórðungi, sem er talsvert meira en reiknað hafði verið með. Tapið er að mestu tilkomið vegna falls á eignasafni, sem tengist bandarískum fasteignalánum. 

Slæm staða bankans dró hlutabréfamarkaðinn niður með sér fyrri hluta dags. Þegar fréttir bárust af leit stjórnenda leitaði markaðurinn upp á við að mestu.

Nokkrir bankar hafa verið nefndir til sögunnar sem hugsanlegir kaupendur. Þar á meðal er bandaríski bankinn Bank of America, hinn breski Barclays, franski bankinn BNP Paribas, þýski risabankinn Deutsche Bank og ýmis fjárfestingafélög, að sögn fréttastofu Associated Press (AP).

Stjórnendur bankans hafa ekki viljað tjá sig um málið, að sögn AP.

Dow Jones-hlutabréfavísitalan hækkaði um 1,46 prósent og Nasdaq-vísitalan um 1,32 prósent.