24,1 % áhorf á Formúlu 1 á Stöð 2 Sport

Ljóst er að Formúlu 1 útsendingar á Stöð 2 Sport hafa fallið vel í kramið og íþróttin heldur sinni stöðu sem vinsælt sjónvarpsefni, þrátt fyrir að hafa skipt um umhverfi, horfið af RÚV yfir á Stöð 2 Sport.

Í aldurshópnum 12-49 ára er áhorfið 24.1% á Stöð 2 Sport, en oftar en ekki líta sjónvarpsstöðvar þann hóp hýrustu augu, þar sem það er aðal markhópur auglýsenda. Þetta á við sjónvarpsstöðvar um allan heim.

Í gær var tilkynnt um það að BBC tæki yfir útsendingar frá Formúlu 1 í Bretlandi, en ITV hefur verið með útsendingarnar síðustu misseri. Það er því víðar breytingar en á Íslandi. BBC hefur gert fimm ára samning við Bernie Ecclestone um útsendingarnar.

Stöð 2 Sport mun sýna öll mót beint, það næsta kl. 06.30 frá Malasíu á sunnudag, en tímatakan verður kl. 05.45 á aðfaranótt laugardags. Þessar tvær beinu útsendingar eru í opinni dagskrá, en allir þættir og endursýningar eru í læstri dagskrá.