Hlutabréf féllu í Bandaríkjunum í dag

Söluhrina skall á undir lok viðskiptadagsins á hlutabréfamörkuðum í Bandaríkjunum í dag með þeim afleiðingum að gengi hlutabréfa féll nokkuð og dró hlutabréfavísitölur niður um rúm tvö prósent.

Fjármálasérfræðingar sögðu í samtali við Associated Press-fréttastofuna ástæðuna fyrir fallinu þá að nokkur taugaveiklun ríki á mörkuðum enn og séu þeir að melta þær tölulegu upplýsingar sem borist hafa um styrk hagkerfisins til að átta sig á stöðunni.

Ljóst þykir að hremmingjar innan bandaríska fjármálageirans eru hvergi nærri að baki. Því til sönnunar lýstu stjórnendur bandaríska bankans Citigroup því yfir í dag að til standi að skera rekstrarkostnað og eignir niður um fimmtung á næstunni og segja upp 53 þúsund starfsmönnum. Reiknað er með að allt að 200 þúsund manns missi vinnuna í fjármálageiranum fyrir árslok.

Þá hillir ekki undir betri tíð í bandaríska bílaframleiðslubransanum auk þess sem væntingar eru uppi um að krepputíð sé hafin enda útlit fyrir að hagvöxtur verði neikvæður á fjórðungnum.

Dow Jones-hlutabréfavísitalan hrundi um fimm prósent fyrr í dag en jafnaði sig nokkuð þegar á leið og endaði í 2,63 prósenta mínus. Þá féll Nasdaq-vísitalan um tæp átta prósent þegar verst lét í dag en snerti botnigildið og leitaði upp á við þegar á leið. Hún endaði í 2,229 mínus.

Associated Press-fréttastofan segir þetta vera fjórða viðskiptadaginn í röð sem gengi hlutabréfa lækkar verulega á Wall Street. Megi reikna með mjög sveiflukenndum dögum á næstunni.

Þróunin á bandaríska hlutabréfamarkaðnum í dag er fjarri því að vera einsdæmi en helstu hlutabréfavísitölur lækkuðu víða um heim í dag.